Mantun organisme alèrta suls obstacles persistents a la justícia pels crimes de la dictatura franquista e de la transicion democratica
Mantun organisme de las Nacions Unidas a exprimit son inquietud davant l’abséncia d’enquistas judiciàrias efectivas dins l’estat espanhòl pertocant dètz e uèch afars ligats als crimes comeses pendent la dictatura franquista e la transicion democratica. Segon Vilaweb, aqueles dorsièrs foguèron presentats dins l’encastre de la nòva lei sus la memòria democratica, mas los organismes internacionals denóncian la persisténcia d’obstacles qu’entrepachan l’accès de las victimas a una justícia efectiva.
Aquela critica figura dins un comunicat oficial adreiçada a l’estat espanhòl e signat pel raportaire especial de las Nacions Unidas encargat de la vertat, la justícia e la reparacion, actualament lo jurista canadenc Bernard Duhaime. Aquel document es tanben signat pel grop de trabalh sus las desaparicions forçadas, lo raportaire de las execucions extrajudiciàrias e la raportaira especiala de la tortura. Lo document ramenta que l’estat espanhòl manca a sas obligacions internacionalas tant qu’engatja pas d’investigacions suls crimes contra l’umanitat e las grèvas violacions dels dreches umans comeses jol franquisme.
Las Nacions Unidas soslinhan que las proceduras judiciàrias contunhan d’èsser blocadas per la lei d’amnestia de 1977, la prescripcion dels delictes e una interpretacion restrictiva del principi de legalitat penala. Recòrdan que lo drech internacional defend d’aplicar d’amnestias o de relambis de prescripcion als crimes contra l’umanitat.
Aquela intervencion fa seguida a una denóncia depausada per las organizacions de defensa dels dreches umans Irídia e la Coordinacion estatala de sosten a la denóncia argentina dels crimes del franquisme (CEAQUA). Las doas entitats reclaman d’ara enlà que lo govèrn espanhòl aplique las recomandacions de las Nacions Unidas, transmeta aquela comunicacion als tribunals e dobrisca d’enquistas exaustivas per tal d’identificar los responsables dels crimes del franquisme.
Demandan tanben l’abrogacion de la lei d’amnestia de 1977, una reforma del còde penal espanhòl e la ratificacion de la convencion internacionala sus l’imprescriptibilitat dels crimes de guèrra e dels crimes contra l’umanitat.
Cap comentari:
Publica un comentari a l'entrada